Бүгін, 16:43
29 қазанда өткен аукцион бағаны төмендету тәсілімен ұйымдастырылған.
Алматы қаласындағы бұрын Қайрат Сатыбалдыға тиесілі болған DoubleTree by Hilton Almaty қонақүй кешені аукцион арқылы 12,4 млрд теңгеге сатылды. Сауда нәтижесі e-Qazyna электронды порталында жарияланды, деп хабарлайды kznews.kz.
Нысанның бастапқы құны 38,3 млрд теңге деп белгіленсе, ең төменгі бағасы 8,9 млрд теңгені құраған. Саудаға екі қатысушы өтінім беріп, нәтижесінде қонақүй 12 384 291 448 теңгеге сатылды. Бұл бастапқы бағадан шамамен үш есе арзан.
Қонақүй Алматының Алмалы ауданындағы Досмұхамедов көшесі, 115 мекенжайында орналасқан. Ғимараттың жалпы аумағы 16,2 мың шаршы метрге жуық. Нысанды сатушы ретінде Алматы қаласының мемлекеттік мүлік және жекешелендіру департаменті көрсетілген.
Алайда аукцион лотына қонақүйдегі жиһаздар мен өзге де жылжымалы мүлік, сондай-ақ Hilton брендін пайдалану құқығы кірмеген.
Айта кетейік, бұған дейін бұл қонақүй Қайрат Сатыбалды мемлекетке қайтарған активтер тізіміне енгізілген еді. Нысанды сатуға арналған алдыңғы аукцион нәтижесіз аяқталған.
