23 желтоқсан, 2025
Танымал тележүргізуші Дана Нұржігіт ресейлік ән жобасына қатысып жатқан қазақстандық әнші Әміреге қатысты пікір білдірді, деп хабарлайды kznews.kz.
Тележүргізуші өз ойын әлеуметтік желідегі парақшасында ашық жазған. Оның айтуынша, кәсіби деңгейі жоғары, елге танылған өнер иелерінің мұндай байқауларға қатысуы ойланарлық жайт.
«Біздің жұлдыздарға мұндай шоуға барудың қаншалықты қажеті бар? Ернар – әлдеқашан мойындалған, вокалдық мүмкіндігі өте жоғары әнші. Мұны дәлелдеу үшін тағы да осындай бағдарламаларға қатысуы міндет пе?! Ішің ашиды. Ол енді тәй-тәй басып жүрген жас өнерпаз емес. Ернардың өз жолы, өз қолтаңбасы бар. Ол біреудің бағасына зәру емес», – деді Дана Нұржігіт.
Айта кетейік, Әміре ресейлік «Браво! Бис!» музыкалық байқауына арнайы шақыртумен қатысқан. Үш күн бұрын әнші жобаның финалына өткенін мәлімдеді. Сонымен қатар ол әлеуметтік желідегі парақшасында байқау барысында қолдау көрсеткен қазылар алқасы мен жоба ұйымдастырушыларына алғыс білдірді.
