7 наурыз, 2026
Иран президенті Масуд Пезешкиан көрші елдерді ракета, дрондармен атқылағаны үшін кешірім сұрап, шабуылды бірінші болып бастамайтынын мәлімдеді, деп хабарлайды kznews.kz.
Оның айтуынша, елдің уақытша басшылық кеңесі Иранға қарсы шабуыл көрші мемлекеттердің аумағынан жасалмаған жағдайда, Таяу Шығыс елдеріне жаңа соққы бермеу туралы шешім қабылдаған.
«Көрші елдерден кешірім сұраймын. Кеше уақытша басшылық кеңесі егер Иранға олардың аумағынан шабуыл жасалмаса, көрші мемлекеттерге қарсы ракеталар ұшыру мен шабуыл жасауды тоқтату туралы шешім қабылдады», – деді Пезешкиан.
Бұған дейін Кувейт, Біріккен Араб Әмірліктері, Әзербайжан, Сауд Арабиясы және басқа да елдер өз аумақтарына ирандық ракеталар немесе дрондар құлағанын хабарлаған.
Иран президенті Тегеранның көрші елдерге қарсы агрессивті жоспарлары жоқ екенін атап өтті. Сонымен бірге ол АҚШ Иранның сөзсіз капитуляциясына үміт артпауы керек екенін айтты.
Пезешкианның сөзінше, Иран халықаралық және гуманитарлық құқық нормаларын сақтайды. Оның айтуынша, бұл қағидаларды қарсы тарап та жиі алға тартады.
