Иран сенбі күні Израильге, сондай-ақ АҚШ-тың Бахрейн, БАӘ, Катар және Кувейттегі әскери базаларына қарсы жауап шабуылын бастады, деп хабарлайды kznews.kz.
Nour News агенттігінің мәліметінше, Иран әскері Израиль аумағына ондаған баллистикалық зымыран ұшырған.
Бахрейнде әуе дабылының сиреналары қосылып, билік тұрғындарға негізгі жолдарды тек аса қажетті жағдайда ғана пайдалануды ұсынды. Al Arabiya телеарнасы бірнеше жарылыс дыбысы естілгенін хабарлады.
Bahrein News Agency ұлттық коммуникация қызметіне сілтеме жасап, АҚШ-тың Бесінші флотының қызмет көрсету орталығы зымырандық шабуылға ұшырағанын мәлімдеді.
Бахрейн ішкі істер министрлігі:
"Әуе дабылы жарияланды. Азаматтар мен тұрғындарға негізгі жолдарды тек қажет болған жағдайда ғана пайдалануды ұсынамыз", – деп мәлімдеді.
Катарда CNN дерегінше, ел аумағында Иранның екі зымыраны әуеде жойылған. Сонымен қатар БАӘ астанасы Абу-Дабиде жарылыстар болғаны хабарланды – әуе қорғаныс жүйелері жұмыс істеген. БАҚ мәліметінше, зымырандар Аль-Дхафра әскери әуе базасына тиген.
Кувейтте де жарылыстар дыбысы естіліп, әуе дабылы қосылғанын Al Jazeera телеарнасы хабарлады.
Al Jazeera телеарнасының ирандық аты-жөні аталмаған шенеунікке сілтеме жасап хабарлауынша, АҚШ пен Израильдің соққыларынан кейін Иран үшін енді "қызыл сызықтар" жоқ.
"Бұл агрессиядан кейін ешқандай "қызыл сызық" қалмады. Барлығы мүмкін, оның ішінде бұрын қарастырылмаған сценарийлер де бар", – деген ол.