Бүгін, 14:27
Бельгиядағы «Mcsradio Aywaille» эфирінде қазақстандық әнші Димаш Құдайбергеннің шығармашылығына арналған арнайы бағдарлама өтіп, оның өнер жолы жан-жақты таныстырылды. Сонымен қатар Қазақстанның мәдениеті мен қазіргі келбеті де кеңінен насихатталды., деп хабарлайды kznews.kz.
Бағдарламаны жүргізушілер Кристиан Филе мен Никки ұйымдастырған. Эфирге Қазақстанның Бельгиядағы елшілігінің дипломаты Рахат Нұрғалиев, KU Leuven студенті Исламбек Сман, домбыра үйреніп жүрген бельгиялық жас Лукас Моммер, сондай-ақ фан-клуб мүшелері Анн Де Грааф мен Венди Мразек қатысты.
Бағдарлама Қазақстан Республикасының Мемлекеттік Әнұранымен ашылып, эфир барысында Димаштың 16 әні орындалды. Қатысушылар әншінің шығармашылық жолын, ерекше вокалдық мүмкіндігін және халықаралық жетістіктерін кеңінен талқылады.
Сонымен бірге тыңдармандарға Қазақстан туралы жан-жақты ақпарат беріліп, мемлекеттік тудың мәні, домбыраның тарихы мен мәдени маңызы таныстырылды. Ел бай мәдени мұрасы бар әрі қарқынды дамып келе жатқан мемлекет ретінде сипатталды.
