Ақмола облысында жеті баланы асырап отырған 31 жастағы Айжалғас Қайруллинов екі айдан аса уақыттан бері хабар-ошарсыз. Туыстары үміт отын үзбей алаңдаулы, деп хабарлайды kznews.kz.
Оқиға Біржан сал ауданына қарасты Кеңащы ауылында болған. Кешкі мезгілде үйінен шығып кеткен ер адам содан кейін қайтып келмеген. Араға уақыт салып, ұлының жоғалып кеткенін айтқан анасы аудандық полицияға ресми арыз түсірген.
Жедел-іздестіру жұмыстарына облыстық полиция департаменті, төтенше жағдайлар қызметі, еріктілер, жақындары және ауыл азаматтары да қатысқан. Олар ауыл төңірегін, ықтимал бағыттарды тексеріп, түрлі деректерді жинағаны айтылады.
Тергеу барысында бірнеше нұсқа қарастырылып жатыр. Соның ішінде Айжалғас Қайруллиновтың жоғалуына бөтен адамдардың қатысы болуы мүмкін деген болжам да жоққа шығарылмаған. Тергеушілер сол күні оны көрген болуы ықтимал тұрғындарды анықтап, ер адамның араласатын ортасы мен соңғы байланыстарын сұрастырған.
Қазіргі таңда іздеу жұмыстары тоқтаған жоқ. Ер адамның фотосуреті еліміздің өзге аймақтарындағы полиция бөлімшелеріне жолданып, әлеуметтік желілерде еріктілер арқылы кең таралуда. Құқық қорғау органдары қандай да бір ақпарат білетін жандардан полицияға хабар беруді сұрайды.