25 қараша, 2025
Денсаулық сақтау министрлігінде қызметтік міндетін атқару кезінде қаза тапқан фельдшер Ұлдана Мырзуанды еске алуға арналған арнайы құрмет көрсетілді, деп хабарлайды kznews.kz.
Министрлікте өткен алқа отырысы басталар алдында Астана қаласының 23 жастағы жедел жәрдем фельдшері Ұлдана Мырзуанның қазасына орай бір минут үнсіздік жарияланды. Әріптестері оның ерлігі мен кәсіби жауапкершілігін құрметпен еске алды.
Хабарламада былай делінген:
«Еліміз бойынша 100 мыңнан астам медицина қызметкері өз жұмыс орындарында әріптесінің жарқын бейнесін еске алып, құрмет көрсетті. Ол шұғыл жағдайда адамдардың өмірін құтқару үшін өз өмірін қиған болатын.»
Сонымен қатар, министрлік Ұлдананың ерлігі мемлекет тарапынан жоғары бағаланғанын атап өтті.
«Ұлдана Мырзуан қаза тапқаннан кейін жоғары мемлекеттік наградамен марапатталды. Ол қызметтік борышын үлгілі орындағаны, ерлігі мен қайсарлығы үшін мемлекет басшысының жарлығымен “Ерлігі үшін” медалімен наградталды», – делінген ресми ақпаратта.
