Министрдің айтуынша, Астанаға жеткізілген бүлдіршіндерге дер кезінде жоғары білікті медициналық көмек көрсетіліп, олардың жағдайы тұрақтала бастады.
«Медицина қызметкерлерінің кәсіби шеберлігінің арқасында ауыр жарақатпен түскен қызға сәтті операция жасалды. Қазір оның өміріне қауіп жоқ», – деді Ақмарал Әлназарова.
Сонымен қатар, ол жеті жасар балаға сүйектерін бекіту үшін арнайы металл стержендер орнатылып, жіліншігіне операция жасалатынын атап өтті. Министрдің айтуынша, мұндай заманауи әдіс жарақаттану деңгейін азайтып, қалпына келу процесін жеделдетуге мүмкіндік береді.
«Балалардың тезірек сауығып кетуін тілеймін! Ал біздің дәрігерлерге кәсібилігі мен адалдығы үшін алғыс айтамын», – деді ол.
Айта кетейік, Үржарда болған қайғылы жол апатында үш бала көз жұмып, тағы үшеуі ауыр жарақат алған еді. Зардап шеккендердің екеуі қазір Астанадағы №2 көпбейінді қалалық балалар ауруханасында ем алып жатыр.
