2025 жылы жүргізілген, 1000 респондентті қамтыған әлеуметтанулық зерттеу қазақстандықтардың реформаларды тек эмоциялық деңгейде емес, күнделікті өмірінде нақты сезініп отырғанын көрсетті, деп хабарлайды kznews.kz.
Сауалнама деректері цифрландыру, инфрақұрылым және әлеуметтік әділеттілік бағытындағы өзгерістердің қоғам назарында екенін аңғартады.
Зерттеу қорытындысына сәйкес, цифрландыру 2025 жылдың басты жетістігі ретінде бағаланған. Респонденттердің 81 пайызы мемлекеттік цифрлық қызметтердің арқасында күнделікті мәселелерді шешу әлдеқайда жеңілдегенін айтқан. Бұл цифрлық сервистердің технологиялық жаңалық қана емес, тұрмыстың ажырамас бөлігіне айналғанын көрсетеді.
Инфрақұрылым саласындағы өзгерістер де тұрғындар тарапынан оң бағаланған. Сауалнамаға қатысқандардың 75 пайызы 2025 жылы ескірген инженерлік желілерді жаңғырту бойынша нақты шаралар қабылданғанын атап өткен. Бұл көбіне көзге көріне бермейтін инфрақұрылымдық жұмыстардың халықтың күнделікті өмірінде сезіле бастағанын білдіреді.
Сонымен қатар, қайтарылған активтерді әлеуметтік нысандар салуға пайдалану саясатының әсері де байқалып отыр. Респонденттердің 57 пайызы мектептер, ауруханалар және өзге де әлеуметтік нысандар санының артқанын мойындаған. Дегенмен, жауап беруге қиналғандардың үлесінің 15 пайызды құрауы бұл бағыттағы жұмыстарды қоғамға кеңірек түсіндіру қажеттігін көрсетеді.
Сарапшылардың пікірінше, адамдар нақты салынған нысандарды көрген сайын әлеуметтік әділеттілік саясатының нәтижесі айқынырақ қабылданады. Ал активтерді қайтару мен олардың нақты қандай жобаларға жұмсалғаны жөніндегі ақпараттың жеткіліксіздігі қоғамдық байланысқа қосымша назар аударуды талап етеді.