Бүгін, 09:20
Жыл басынан бері Бірыңғай жинақтаушы зейнетақы қорының инвестициялық табысы 794,85 млрд теңгені құрады.
Қор деректеріне қарағанда, бұл табыстың басым бөлігі қаржы нарықтарындағы өсімнен емес, тұрақты пайыздық төлемдерден түскен екен. Атап айтқанда, облигациялар, депозиттер және айналым операциялары бойынша алынған сыйақы көлемі 928,7 млрд теңгеге жеткен. Бұл зейнетақы активтерінің негізгі кіріс көзі ретінде тіркеліп отыр.
Алайда, шетел валюталары бағамының жиі өзгеруі инвестициялық нәтижеге кері әсер етіп, табысты шамамен 189 млрд теңгеге қысқартқан көрінеді. Яғни, валюта нарығының құбылуы қор кірісінің бір бөлігін төмендеткен.
Сарапшылардың пікірінше, бұл көрсеткіштер құбылмалы қаржы нарықтары жағдайында тұрақты табыс әкелетін құралдардың, әсіресе облигациялардың маңызы артып отырғанын көрсетеді. Нәтижесінде зейнетақы портфелінің табыстылығы көбіне бағалы қағаздардан түсетін тұрақты пайыздық төлемдер есебінен қамтамасыз етілген.
Жалпы, 1-маусымдағы жағдай бойынша Ұлттық банктің басқаруындағы зейнетақы активтерінің жалпы көлемі 26,4 трлн теңгеге жетті.
Тоқетерін айтқанда, БЖЗҚ кірісінің негізгі бөлігін қор нарығындағы баға өсімі емес, облигациялар мен депозиттерден түсетін тұрақты пайыздық төлемдер қалыптастырып отыр. Бұл зейнетақы активтерін басқаруда сақтық пен тұрақтылыққа басымдық беріліп отырғанын аңғартады. Яғни, Ұлттық банктің "екі шоқып, бір қарап отырғанын" түсінуге болады.
