Бүгін, 10:57
Бүгін Астана қаласында әскери қызмет барысында ауыр жарақат алып, ұзақ уақыт ем қабылдаған Ербаян Мұхтар ақтық сапарға шығарып салынды. Ұлттық ұланның бұрынғы сарбазымен қоштасу рәсімі Шейх Кунта Қажы атындағы мешітте өтті, деп хабарлайды kznews.kz.
Марқұммен қоштасуға оның туған-туыстары, достары, жақындары және қайғылы оқиғаға бейжай қарамаған жүздеген қазақстандық жиналды. Жиналған жұрт Ербаянның рухына құран бағыштап, жаназа намазын оқыды. Кейін оның мәйіті жерлеу рәсімін өткізу үшін зиратқа жеткізілді.
Еске салсақ, Ербаян Мұхтар әскери борышын өтеп жүрген кезінде ауыр бас-ми жарақатын алып, бірнеше жыл бойы өмірі үшін күресті. Осы уақыт аралығында ол бірнеше күрделі операцияны бастан өткеріп, Қазақстанда және шетелде ем қабылдағанымен, дәрігерлер оның өмірін сақтап қала алмады.
Қоштасу рәсіміне Ұлттық ұланның өкілдері мен әскери қызметкерлері де қатысты. Олар мешітке арнайы автобуспен келген. Алайда әскери формадағы азаматтар журналистердің сауалдарына жауап беруден бас тартып, оқиғаға қатысты пікір білдірмеді.
Ербаян Мұхтардың қазасы қоғамда үлкен резонанс туғызды. Оның тағдырына алаңдаған мыңдаған қазақстандық соңғы жылдары сарбаздың емделуіне қолдау білдіріп, сауығып кетуіне тілекші болған еді.
