БҚО-ның қырыққа жуық тұрғынын алдап кеткен өзбекстандық азамат сотталды
2018 жылғы 5 желтоқсан 16:36 112
ОРАЛ. ҚазАқпарат - Орал қалалық сотының үкімімен аса ірі мөлшерде алаяқтық жасаған өзбекстандық азамат Муродулло Юлдашев сотталды, деп хабарлайды ҚазАқпарат тілшісі.
Аталмыш соттан түскен мәліметке қарағанда, М.Юлдашев ҚР ҚК 190-бабы 4-бөлігіне сәйкес айыпты деп танылды.
Өзбекстандық азаматқа 5 жылға бас бостандығынан айыру жазасын қауіпсіздігі орта қылмыстық-атқару жүйесі мекемесінде өтеу кесілді.
1993 жылғы М.Юлдашев тергеу барысында анықталмаған тұлғалармен ымыраласып, алаяқтық жолмен тез баюды жоспарлап, Қазақстан аумағында «Лесных» ЖШС-ын құрған.
Ол интернетте құрылыс материалдарын базардағыдан төмен бағамен сату туралы хабарландыру орналастырып, алдын ала төлемақы алып, қазақстандық азаматтармен келісімге отырған. Содан кейін түрлі сылтаулармен құрылыс материалдарын жеткізу кешіктіріле берілген.
Осылайша М.Юлдашев БҚО-ның 39 азаматына аса ірі мөлшерде материалдық залал келтірген.
Жәбірленушілердің пайдасына азаматтық талап-арыз бойынша залалдар өндірілді.
Сот үкімі заңды күшіне енген жоқ.
Еске сала кетейік, бұдан бұрын ірі көлемде алаяқтық жасаған өзбекстандық азаматтың тергеліп жатқанын жазған болатынбыз.
