Бүгін, 12:21
7 шілдедегі Үкімет отырысында Премьер-министр Олжас Бектенов газ саласындағы тарифтік саясатты өзгертіп, тиімсіз кәсіпорындарға газды арзан бағамен беруді тоқтатуды тапсырды, деп хабарлайды kznews.kz.
Жаңа тариф
Премьер-министр газ саласындағы қолданыстағы баға белгілеу жүйесі оның дамуына кедергі болмауы керектігін айтып, осыған байланысты Ұлттық экономика министрлігі, Бәсекелестікті қорғау және дамыту агенттігі және басқа да жауапты органдар екі ай ішінде жаңа тарифтік саясат бойынша ұсыныстар әзірлеп, Үкіметке енгізуді тапсырды
Алайда бұл ретте әлеуметтік факторлар ескерілуі қажет: халыққа арналған атаулы әлеуметтік қолдау шаралары сақталуы керек.
"Елдегі тұтыну көлемі белсенді түрде өсіп жатқан жағдайда қолжетімді газ көлемі ең алдымен халықтың қажеттілігіне және жоғары технологиялық өндірістерді дамытуға бағытталуы тиіс", - деді Үкімет басшысы.
Сонымен қатар Олжас Бектенов мәселе халық үшін газ бағасында емес, коммерциялық сектордың газды тиімсіз пайдалануында екенін атап өтті.
Ол Энергетика министрлігіне және өңір әкімдіктеріне тауарлық газ қажет болатын жаңа өндірістер үшін бір ай ішінде энергия тиімділігі критерийлерін әзірлеуді тапсырды. Сондай-ақ пайдалы ресурсты газды тиімсіз жұмсайтын кәсіпорындарға беруді тоқтатуды міндеттеді.
"Энергияны көп қажет ететін және тиімсіз өндірістерге газ беру тәжірибесін тоқтату қажет", - деді Бектенов.
Газ кімге көбірек қажет?
Газға деген сұраныс халық арасында да, өнеркәсіптік кәсіпорындар арасында да үнемі артып келеді. Сондықтан экономика қажеттілігі мен қазақстандықтардың тұрмыстық қажеттіліктері арасында тепе-теңдікті сақтау қажет.
Сонымен қатар жаңа өңдеу зауыттарын іске қосу үшін инфрақұрылым құру, инвестициялар тарту және халықты қолжетімді газбен қамтамасыз ету міндеті қатар орындалуы тиіс. Бұл оңай шаруа емес, бірақ оны жүзеге асыру қажет.
"Ерекше назарды сұйытылған мұнай газы нарығындағы жағдайға аудару қажет. Сұраныс жыл сайын артып келеді. Бұл отынды шикізат ретінде пайдаланатын өндірістердің дамуына байланысты. Энергетика министрлігіне «ҚазМұнайГаз» компаниясымен бірлесіп, бір ай ішінде сұйытылған мұнай газын өндіру көлемін арттыру бойынша нақты жоспар ұсынуды тапсырамын. Сұйытылған мұнай газын өңірлер арасында және өңірлер ішінде бөлудің ашық механизмі қамтамасыз етілуі тиіс", - деп тапсырды Премьер-министр.
