22 қазан күні Мәскеуде Ресей мен Қазақстанның сыртқы істер министрлері Сергей Лавров пен Ермек Көшербаевтың бірлескен баспасөз мәслихаты өтті. Жиынның басында Лавров қазақстандық әріптесінің тегін қате атады, деп хабарлайды Kznews.kz.
Іс-шара екі ел министрлерінің келіссөздерінен кейін ұйымдастырылған болатын.
– Құрметті ханымдар мен мырзалар, Біз Қазақстан Республикасының Сыртқы істер министрі Ермек Бидэлбаевич Көшербаевпен келіссөздер жүргіздік. Келіссөздер ашық әрі конструктивті өтті, – деді Лавров сөзінің басында.
Алайда, Қазақстан Сыртқы істер министрінің орысша аты-жөні – Кошербаев Ермек Беделбаевич.
Айта кетейік, бұл Ресейдің жоғары лауазымды тұлғаларының Қазақстан саясаткерлерінің есімдері мен тектерін шатастырып айтуы алғаш рет болып отырған жағдай емес. Бұған дейін Владимир Путин де президент Қасым-Жомарт Кемелұлы Тоқаевтың атын бірнеше рет қате атаған болатын.
