Ер адамның адвокаты Тілеужан Кішкенебаевтың сөзінше, полиция оның арыздарын тіркегенімен, тиісті шара қолданбаған, деп хабарлайды kznews.kz. Ал қалалық полиция департаменті әйелге қатысты сотқа дейінгі тергеу жүріп жатқанын хабарлады.
Он жыл отасқан ерлі-зайыпты ажырасқаннан кейін де бір үш бөлмелі пәтерде тұрып келеді. Ер адам бұрынғы әйелі осындай әрекеттерімен өзін ортақ баспанадан кетіруге тырысып жүр деп есептейді.
Адвокаттың айтуынша, жақында бұрынғы жұбайы ер адамның балағат сөз айтқанын айтып, полицияға арызданған. Осыдан кейін оның клиенті ұсақ бұзақылық үшін он тәулікке қамалған.
Алайда қорғаушы ер адамның өзіне күш қолданылғаны туралы шағымдарына да тиісті назар аударылуы керек екенін көтеріп отыр. Оның мәлімдеуінше, полиция бұл арыздарды тіркегенімен, тергемеген.
Ал Алматы полиция департаменті HALYQSTAN тілшісіне берген жауабында бұрынғы әйеліне қатысты ұрып-соғу дерегі бойынша қылмыстық іс тергеліп жатқанын мәлімдеді. Қазір оқиғаның барлық мән-жайы анықталып жатыр. Тергеу қорытындысы бойынша процессуалдық шешім қабылданады.
Осылайша, адвокат полицияның әрекетсіздігін айтып отырса, ведомство тергеудің жүріп жатқанын хабарлады. Әйелдің тағылған айыптарға қатысты ұстанымы берілген ақпаратта көрсетілмеген.