Бүгін, 11:31
Ресейде жанармай тапшылығы мен бағаның күрт өсуі көрші ел тұрғындарын Қазақстанға бет бұруға мәжбүрлей бастады. Әлеуметтік желілерде ресейліктердің Қазақстанға арнайы келіп, көліктерін жанармайға толтырып жатқан видеолары көбейіп жатыр. Интернет қолданушылары мұны әзіл-шыны аралас «бензин туризмі» деп атап үлгерді, деп хабарлайды kznews.kz.
Желіде тараған видеолардың бірінде Самара қаласының тұрғыны Батыс Қазақстан облысындағы Орал қаласына келіп, жергілікті жанармай құю бекетінде көлігін толық жанармаймен қамтамасыз еткенін көрсетеді. Оның айтуынша, Оралға жетуге небәрі екі сағаттай уақыт кеткен, ал бензин бағасы Ресеймен салыстырғанда екі есеге жуық арзан.
Бейнежазба авторы Қазақстандағы жанармай құю бекеттерінде рубльді теңгеге айырбастауға да мүмкіндік бар екенін айтып, бұл жағдайды көрермендеріне ерекше артықшылық ретінде таныстырады. Сондай-ақ ол басқа ресейліктерді де Қазақстанға келіп жанармай құюға шақырады.
Дәл қазіргі уақытта Ресейдің өзінде жанармай тапшылығы күрделене түсті. Әлеуметтік желілерде Мәскеу мен өзге де қалалардағы жанармай бекеттерінде ұзын-сонар кезек пайда болғанын көрсететін видеолар таралуда. Кейбір кадрларда жүргізушілердің кезекке таласып, жанжалдасып жатқанын көруге болады.
Басқа бір видеода бірнеше сағат бойы кезекте тұрған жүргізушілердің небәрі 15 литр бензин сатып алғанына ерекше қуанып жатқан сәті түсірілген. Желі қолданушылары мұндай көріністердің Ресейдегі жанармай нарығындағы ахуалдың күрделене түскенін көрсететінін жазуда.
Әзірге Қазақстан билігі тарапынан шекаралас өңірлерде жанармай сатып алуға байланысты қандай да бір шектеу енгізілетіні жөнінде ресми ақпарат жарияланған жоқ. Дегенмен әлеуметтік желілерде көрші ел азаматтарының Қазақстанға жанармай үшін жиі келе бастағаны қызу талқыланып жатыр.
Сарапшылардың пікірінше, егер бұл үрдіс күшейе түссе, шекара маңындағы өңірлердегі жанармай нарығына қосымша сұраныс түсіп, ішкі нарықтағы жағдайға да әсер етуі мүмкін.
