Бүгін, 11:14
Қазақстанның үш қаласында тұрғындар жылу беру сапасына және оның уақытша тоқтатылуына шағымданып жатыр. Бұл туралы Үкімет отырысында Премьер-министр Олжас Бектенов мәлімдеді, деп хабарлайды kznews.kz.
Үкімет басшысының айтуынша, қазір еліміздің барлық өңірінде жылу бекітілген кестеге сәйкес беріліп жатыр. Алайда кейбір қалаларда тұрғындар жылудың жеткіліксіздігіне және оның үзіліп қалуына қатысты мәселелерді көтерген.
«Тұрғындар жылу сапасына және оның өшірілуіне байланысты шағымданып жатыр. Атап айтқанда, Ақтау, Павлодар және Петропавл қалаларынан өтініштер түсті», – деді Олжас Бектенов.
Осыған байланысты Премьер-министр өңір әкімдеріне жылыту маусымының өтуін бақылауға жауапты штабтардың жұмысын күшейтуді тапсырды.
Сондай-ақ ол тұрғындардан түскен шағымдарға жедел назар аударып, жылумен қамту мәселелерін уақытылы шешу қажеттігін айтты.
