Бүгін, 20:53
Үндістанда жұртты таңғалдырған оқиға болды: көп жыл бойы қайыршы кейпінде жүрген ер адам шын мәнінде бірнеше үйі, көлігі және табысты кәсібі бар ауқатты адам болып шықты, деп хабарлайды kznews.kz.
Daily Mail басылымының мәліметінше, Мангилал есімді ер адам шамамен 50 жыл бойы Үндістанның Индор қаласындағы Сарафа Базар маңында тіршілік еткен. Ол дөңгелекті шағын платформаның үстінде отыратын, денсаулығы нашар, алапес дертіне шалдыққан адам ретінде танылған. Қала билігі көшедегі әлеуметтік әлсіз топтарды құтқару науқаны аясында оны арнайы орталыққа жеткізуді ұйғарған.
Мангилалды алып кетіп, жуындырып, таза киіндірген соң, күтпеген жайт анықталған. Белгілі болғандай, ол бірнеше жылжымайтын мүлікке ие: үш қабатты үйі, бір пәтері бар. Сонымен қатар жеке автокөлігі менжалға берілетін бірнеше авто-рикшасы болған.
Тергеу барысында оның қайыр сұрап жинады делінген қаржыны да жай ұстамай, жергілікті нарыққа инвестициялап, саудагерлерге қарызға беріп отырғаны белгілі болды.
Бұл ақпарат тарағаннан кейін Мангилалдың туыстары оның байлығы әсіреленіп көрсетілгенін айтып, наразылық білдірген. Дегенмен, билік өкілдері оны әлеуметтік бағдарлама аясында берілген тұрғын үйден айыруды, сондай-ақ банктік шоттарын жан-жақты тексеруді жоспарлап отыр.
Айта кетейік, Индор қаласында қайыршылықпен күрес науқаны барысында 6 мыңнан астам баспанасыз адам анықталған. Олардың 4,5 мыңнан көбі қазір қайыр сұрауын тоқтатқаны хабарланды.
