Бүгін, 16:34
Астанада Алматының бұрынғы әкімі Бауыржан Байбекке тиесілі қымбат қолсағаттардың жоғалуына байланысты қылмыстық іс тергеліп жатыр. Полиция 31 жастағы күдіктінің ұсталғанын растады.
Журналист Михаил Козачковтың мәліметінше, күдікті бұрын Байбектің көмекшісінің қарамағында жұмыс істеген және үйдегі бағалы заттардың қай жерде сақталатынын білген болуы мүмкін.
Журналистің нұсқасы бойынша, үй иелері болмаған кезде ер адам қосалқы кілт арқылы баспанаға кіріп, қымбат сағаттарды алып кеткен. Сондай-ақ түпнұсқа бұйымдардың орнына олардың көшірмелері қалдырылғаны айтылады.
БАҚ-та тараған бастапқы ақпаратта ұрланған сағаттардың арасында Breguet, Blancpain, Hublot, Jaeger-LeCoultre және A. Lange & Söhne маркалары болғаны және олардың жалпы құны шамамен 90 млн теңгеге бағаланғаны жазылды. Алайда бұл сома полицияның түпкілікті бағалауы емес.
Кейінгі мәліметтерде құқық қорғау органдарына Бауыржан Байбектің жұбайы жүгінгені және тергеу жоғалған заттардың нақты саны мен құнын анықтап жатқаны хабарланды.
Астана полициясының мәлімдеуінше, ұрлық дерегі бойынша қылмыстық іс қозғалған. Күдікті ұсталып, тергеу амалдары жалғасып жатыр.
