17 қаңтар, 2026
Үндістанның Махараштра штатында 103 жастағы әйел өзіне арналған жерлеу рәсімі кезінде тіріліп кетіп, жұртты таңғалдырды. Бұл оқиға дәл оның туған күні болған, деп хабарлайды kznews.kz.
Hindustan-times басылымының мәліметінше, 103 жастағы Гангабаи қайтыс болды деп есептеліп, жерлеу рәсіміне барлық дайындық жасалған. Үйінің алдына дәстүрлі шатыр тігіліп, әйелге жерлеу рәсіміне арналған сари кигізілген. Қоштасуға туыстары мен жақындары жиналып, мәйітті алып кететін көлікті күтіп отырған.
Алайда аза тұтып отырғандар күтпеген жағдайға куә болды: "марқұм" қозғала бастап, кенеттен отыруға талпынған. Ең таңғаларлығы – бұл сәт дәл оның туған күніне тұспа-тұс келген.
Туыстары болған жағдайды ғажайыпқа балап, қаралы ас орнына Гангабаидың 103 жылдық мерейтойын атап өткен.
