Енді өңірлік мәслихаттар ауызсудың бір текше метріне төленетін төлем мөлшерін өздері реттей алады. Бұл норма Қазақстанның Су кодексіне сәйкес енгізілді.
Жаңа ережелерге сай, жергілікті атқарушы органдар тұрғындар үшін ауызсу тарифін өз бетінше бекіте алады. Төлем мөлшері өңірдің әлеуметтік-экономикалық жағдайы мен қолданыстағы сумен жабдықтау тарифтеріне байланысты айқындалады.
Бұл туралы Индустрия және құрылыс министрлігінің Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков айтты.
– Қазір жергілікті атқарушы органдар халыққа арналған судың құнын анықтау бойынша жұмыс жүргізіп жатыр. Тарифтер республикалық орташа деңгей шегінде бекітіледі. Егер бір адамға тәулігіне белгіленген 140 литр нормадан артық су жұмсалса, артық көлем үшін төлем 30 пайызға жоғары ставкамен есептеледі, – деді ол.
Жаңа ереже суды ұқыпты пайдалануға ынталандыру және өңірлік теңгерімді сақтау мақсатында енгізілді.
