12 қыркүйек, 2025
Атырау облыстық құрылыс, сәулет және қала құрылысы басқармасы басшысының орынбасары Талғат Бисен ұсталды, деп хабарлайды құқық қорғау органдарындағы дереккөздер.
33 жастағы шенеунік іссапардан оралған сәтте облыс әкімдігі ғимаратында қолға түскен. Ол мердігер компания жетекшісінен пара алды деген күдікке ілінді.
Бұл дерекке қатысты қылмыстық іс қозғалып, мердігер ұйымның кеңсесінде және әкімдік ғимаратында тінту жүргізілген.
Қазіргі уақытта Талғат Бисен қолхатпен босатылды. Алайда тергеу органдары оны қамауға алу жөнінде сотқа өтініш беруді жоспарлап отыр.
Қылмыстық істің тергеуі жалғасып жатыр.
