Бүгін, 14:05
Атырау қаласында 118 спорт алаңына 2985 алкомаркеттен келеді. «Дала Қырандары» қоғамдық қозғалысы Қазақстанның 29 қаласында жүргізген мониторинг нәтижесінде жастарға спорттан гөрі алкогольдің әлдеқайда қолжетімді екенін мәлімдеді, деп хабарлайды kznews.kz. Зерттелген қалалардың тек екеуінде ғана спорт алаңдарының саны алкомаркеттерден көп.
16 мамыр күні «Дала Қырандары» қоғамдық қозғалысы осы деректерді жариялап, дәстүрлі баспасөз мәслихатының орнына ерекше форматтағы ашық жаттығу ұйымдастырды. Іс-шара Қарағанды қаласындағы аулалардың біріндегі спорт алаңында өтіп, оған журналистер мен жергілікті тұрғындар қатысты.
Кездесудің ең әсерлі сәттерінің бірі — белсенді азаматтардың үлкен баннер ілуі болды. Баннерде «Қазақстан жеңіліп жатыр» деген жазумен қатар, қаладағы алкомаркеттер мен спорт алаңдарының саны салыстырмалы түрде көрсетілген. Үлкен сан — алкоголь сататын нүктелердің, ал кіші сан спорт алаңдарының көрсеткіші болды.
Белгілі болғандай, бұл мәліметтер «Дала Қырандары» қозғалысының #суррогат және #жаттығу бастамалары аясында жүргізген ауқымды зерттеуінің нәтижесі. Белсенділер елдегі 29 қалада алкоголь өнімдерін сататын орындар мен бұқаралық спорт алаңдарын санап шыққан.
Кейбір өңірлердегі айырмашылық айрықша үлкен. Мәселен:
Атырауда — 118 спорт алаңына 2985 алкомаркеттен келеді;
Ақтөбеде — 200 спорт алаңына қарсы 960 ішімдік сауда нүктесі жұмыс істейді;
Қарағандыда — 94 спорт аймағына 271 алкомаркет тіркелген.
Қозғалыс өкілдерінің айтуынша, барлық дерек интерактивті картаға енгізілген. Енді кез келген азамат арнайы сайт арқылы өз өңіріндегі жағдаймен таныса алады.
«Біз ортаның адамды қалыптастыратынына сенеміз. Егер әр аулада сапалы турник пен футбол алаңы болып, тұрақты жаттығу ұйымдастырылса, елімізде дені сау әрі рухы мықты ұрпақ өседі. Бірақ қазіргі статистика мүлде басқа шындықты көрсетіп отыр. Көптеген қалада спорт алаңынан гөрі алкомаркетті табу оңай. Бұл — болашақ ұрпаққа төнген қауіп», — деді қозғалыс үйлестірушісі Нұрбол Сейтқалиев.
Іс-шараның дәл белсенділердің өз күшімен абаттандырылған аулада өтуі де кездейсоқ емес. Ашық жаттығу барысында ұйымдастырушылар жергілікті тұрғындардың бастамасы арқылы қоршаған ортаны өзгертуге болатынын көрсетті.
«Көп жағдайда жауапкершілікті мемлекетке немесе кәсіпкерлерге артып қоямыз. Алайда тәртіп әр адамнан басталады. Бұл алаң — соның дәлелі. Көршілер бірігіп, өз ауласын ретке келтірсе, олар тек спорт құралдарын жөндеп қоймай, сол ортада өсіп жатқан балалардың тағдырын өзгертеді. Біз жариялаған статистика — бейжай қарамайтын азаматтарды әрекетке шақыру», — деді «Дала Қырандарының» Қарағанды облысы бойынша жетекшісі Нұрсейіт Құдайберген.
Қозғалыс алдағы уақытта да заңсыз алкоголь саудасына мониторинг жүргізіп, аула спорты мәдениетін дамыту бағытындағы жұмыстарын жалғастырмақ.
Өз қалаңыздағы статистиканы көру үшін ресми сайтқа кіре аласыз: satkyndar.kz
