19 қараша, 2025
Ақтөбе облысының әкімі Асхат Шахаров Астанада өткен есептік брифингте Хромтау қаласының әкімі Сағындық Шабықбаевтың қамауға алынуына қатысты сұраққа жауап берді, деп хабарлайды kznews.kz.
Журналист тергеу барысында Сағындық Шабықбаевтың кінәсі расталса, Хромтау ауданының әкімі Нұрхан Тілеумұратов жауапқа тартылуы мүмкін бе деп сұрады.
«Иә, бұл мәселе қаралуда. Барлық іс-қимылдар заң аясында жүзеге асады. Егер тергеу барысында адам қылмысқа қатысы бар екені дәлелденсе, ол міндетті түрде жауапқа тартылады», - деді Шахаров.
Әкімнің айтуынша, тергеу жұмыстары әлі жалғасып жатыр, нақты шешімдер тек сот үкімі шыққаннан кейін қабылданады.
Сағындық Шабықбаев 40 жаста, екі жыл бойы Хромтау қаласы әкімі қызметін атқарған, бұған дейін әкімнің орынбасары болған.
Еске салсақ, 11 қарашада сот шешімімен Хромтау қаласының әкімі Сағындық Шабықбаев екі айға қамауға алынған болатын. Тергеудің нақты қандай бап бойынша жүргізіліп жатқаны ресми түрде жарияланбаған, алайда кейбір БАҚ оның пара алу күдігіне ілінгенін жазған.
