17 қыркүйек, 2025
Бұл туралы Күрті ауылдық округінің әкімдігі Instagram желісінде мәлім етті. Әкімдік мәліметінше, Қуанбек пен Жәйнаның ат үстінде жүргеніне 1 ай болды.
Ұлттық Дәстүрді дәріптеген саяхатшыларды Күрті ауылдық округ әкімі Ғабит Даниялұлы мен әкімдік қызметкерлері, Ақши ауылының тұрғындары, Мәдениет үйінің қызметкерлері құрметпен қарсы алып, жөн сұрасты. Қонақтарға ақ дастархан жайылып сый құрмет көрсетіліп, Мәдениет үйі қызметкерлері тарапынан ән шашу ұсынылды.
Қуанбек пен Жәйна Қазақстанға 8 тамызда шыққан. Тарбағатай аймағынан Қорғас бекетіне дейін 900 шақырым жүрген оларды ағайын туыс пен екі ұлы шекараға дейін шығарып салған, кеден талабына сай өз аттарын арғы бетте қалдырған, Қорғаста басқа жылқыларға мінген.
Ерлі-зайыптының өзгеше сапарының мақсаты – ұлттық дәстүрді дәріптеп, екі елдің арасындағы мәдени байланысты арттыру. 12 жыл бұрын отау құрған ерлі-зайыпты жылқы малын көбейтумен айналысады.
"Ақшиге дейін шаршамай жеттік", - дейді Жәйна Еркінқызы.
Қуанбек пен Жәйна ұлттық киім киіп, атпен ел аралауды 4 жыл бұрын бастаған. Олар алғаш рет Тарбағатай аймағынан шығып Бейжіңге дейін 4 мың шақырымды 74 күнде жүрген, одан кейін Қытайда өткен 500 шақырымдық атты марафонға да қатысқан. Ендігі сапары 2500 шақырымға жуық.
