22 сәуір, 2026
Астанадағы Түркістан көшесінде орналасқан тұрғын үйде болған өрттен кейін тек күйген пәтер ғана емес, жауапсыз қалған көптеген сұрақтар да туындады, деп хабарлайды kznews.kz Ulysmedia.kz сайтына сілтеме жасап.
Қайғылы оқиға болған түні үш бала көз жұмып, олардың анасы тірі қалған. Көршілердің айтуынша, өрт кезінде қабырға сыртынан көмекке шақырған айқай емес, әлсіз дыбыстар мен дұға сөздері естілген. Анасы балаларын құтқаруға әрекет жасады ма, есік неге жабық болды, сол түні нақты не орын алғаны әлі де белгісіз күйінде қалып отыр.
Арада бір аптадан астам уақыт өтсе де, оқиғаға қатысты нақты әрі толық ақпарат берілген жоқ. Ресми дерекке сүйенсек, шамамен 50 шаршы метрлік пәтерде өрт түн ортасынан кейін басталған. Оқиға орнынан 13 жастағы Айзере, 2 жастағы Айпара және бір жасқа толмаған Арланның мәйіттері табылған. Олардың анасы Жанаргүл Қожамкей аман қалғанымен, денесінің 35 пайызы күйіп, көмірқышқыл газынан уланған. Өрттің шығу себебі әзірге жарияланбаған.
Мамандардың түсіндіруінше, өрт кезінде таралатын қою түтін адамның бағдарын жоғалтып, тұншығуына себеп болады. Мұндай жағдайда адам шығатын жолды таба алмай қалуы әбден мүмкін.
Көршілердің бірі сол түндегі жағдайды былай еске алады: шамамен сағат 01:17-де оянып, алдымен оттың сытырлаған дыбысын, кейін түтінді байқаған. Пәтер жақтан әлсіз дауыс шыққан. Ол дереу сыртқа шығып, басқа тұрғындарды көмекке шақырған.
«Мен “Не қарап тұрсыңдар? Пәтер жанып жатыр! Ішінде адам бар!” деп айқайладым. Бірақ олар “қолымызда ештеңе жоқ” деді. Кейін ғана бәрі қозғала бастады. Көпшілігі түтінге уланып, не болып жатқанын бірден түсінбеген сияқты», – дейді куәгер.
Қазіргі уақытта өрттің нақты қай жерден шыққаны, ананың есікке дейін жеткен-жетпегені немесе қашан есінен танғаны белгісіз. Мамандардың айтуынша, қою түтін жағдайында адам бірнеше қадам жасауға да шамасы келмеуі мүмкін.
Отбасының өмірі туралы деректерге қарағанда, Жанаргүл Қожамкей Қытайдан көшіп келген қандас болған. Астанаға келмес бұрын Шығыс Қазақстан облысында тұрған, ол кезде тұрмыста болмаған.
Үлкен қызы Айзере денсаулығына байланысты ерекшелігіне қарамастан, YouTube желісінде блог жүргізген. Ал Жанаргүл интернет арқылы балалар аяқ киімін сатып, табыс тапқан, оның ZEKE-BAI атты жеке кәсіпкерлігі тіркелген. Күйеуі автокөлік бөлшектерін сатумен айналысқан.
Отбасы шағын пәтерде тұрған: үш бала, оның ішінде ерекше күтімді қажет ететін қыз және табыс табуға тырысқан ана.
Ашық деректерге сәйкес, Жанаргүл бұрын журналист болып, қазақ тіліндегі сайттарға жазған. Ол қоғамдық мәселелерге де пікір білдіріп отырған. Әсіресе Жаңаөзен оқиғасы кезінде қандастарға қатысты айтылған сындарға қарсы шығып, оларды негізсіз айыптауды сынаған.
Сонымен қатар, ол жеке блог жүргізіп, өмірі жайлы жазбалар жариялаған. Соңғы жазбаларының бірі үлкен қызына арналған:
«Менің барым, бақытым, Алланың сыйы. Сенің күлкің – менің ең жарық әлемім. Саған ең басты байлық – денсаулық тілеймін. Өмірің мәнді әрі жарқын болсын. Мен сені жақсы көремін», – деп жазған.
Куәгерлердің айтуынша, балалар өрт сөндірушілер жеткенше түтінге уланып көз жұмған. Бұл жағдай тұрғындарға ауыр соққы болған.
Көршілердің бірі балалардың дауысына үйреніп қалғанын, оларды күн сайын көріп жүргенін айтады. Қайғылы оқиғадан кейін балалардың әкесі қатты күйзеліске түсіп, жедел жәрдем көмегіне жүгінген.
