Бүгін, 12:29
Елорда төріндегі мерекелік көңіл-күй үлкен дауға ұласты. Бесінші шілде күні кешке Астана жұртшылығы аспандағы ғажайып көріністі тамашалауға жиналған еді. Алайда мыңдаған көрермен ауқымды жарық спектаклінің орнына небәрі сегіз минуттық жарнамалық қойылым көріп қайтты, деп хабарлайды kznews.kz ozgeris.info сайтына сілтеме жасап.
Бұл шара туралы қалалық афишалар мен әлеуметтік желілерде жарыса жазылды. Халыққа ұшқышсыз аппараттар Астанаға арналған түрлі бейнелер жасайды деп уәде етілген. Жұртшылық жағалауға ерте бастан жиналды. Отбасымен және кішкентай балаларымен келгендер көп болды. Кейбір азаматтар тіпті Атыраудан арнайы туыстарын шақырған. Адамдар мерекелік атмосфераны сезіну үшін төрт сағат бойы тағатсыздана күткен.
Іс жүзінде аспанда бар-жоғы төрт сурет пайда болды. Оның екеуі шетелдік әнші Иглесиастың, біреуі Freedom компаниясының жарнамасы болып шықты. Жұрт тек жалғыз Бәйтерек монументінің бейнесін ғана көрді. Осылайша көрсетілімнің бес минуты таза пиарға арналды.
Қысқа ғана қойылымнан кейін жағалауда адам нанғысыз кептеліс басталды. Бала арбасын сүйреген мыңдаған тұрғын үйлеріне бір уақытта қайта алмай қиналды. Желі қолданушылары бұл жағдайды нағыз масқара мен мазаққа балады. Ашуланған жұрт мерекелік шара кезінде мұндай коммерциялық сюжеттерге кім рұқсат бергенін сұрап жатыр. Оған қанша қаражат жұмсалды деген сауал да ашық қалды.
Бұл шараны Aspan Galaxy компаниясы ұйымдастырған. Олар барлық тиісті келісімдерді алдық деп ақталды. Оған қоса бұл көрініс Астана күнін тойлаудың ресми бағдарламасына мүлдем кірмеген екен. Бірақ бұл сөздер ашулы халықты сабасына түсіре алмады. Өйткені қарапайым жұрт алдағы шараның кәдімгі жарнамалық акция екенін алдын ала білмеген.
