18 қыркүйек, 2025
Жасөспірім ауруханаға түскен сәтте жағдайы өте ауыр болған. Ол жансақтау бөліміне жеткізіліп, қарқынды терапия алған.
«Дәрігерлер барлық қажетті ем-шараларды жүргізді, республикалық деңгейдегі мамандардың қатысуымен бірнеше рет консилиум ұйымдастырылды. Алайда медициналық көмектің бар мүмкіндігі жасалғанына қарамастан, баланың жағдайы күрт нашарлап, 15 қыркүйекте қайтыс болды», – деді басқарма өкілдері.
Айта кетейік, 7 қыркүйекте Ақмола облысында өткен қазақша күрес турнирінде жасөспірім мойын сүйегін сындырып алған. Ол санитарлық авиация арқылы шұғыл түрде Астанадағы №2 көпсалалы қалалық балалар ауруханасына жеткізілген. Қазіргі таңда полиция аталған факті бойынша қылмыстық іс қозғап, тергеу амалдарын жүргізіп жатыр.
