Бүгін, 20:13
Астанадағы ескі теміржол вокзалында орналасқан асхананың төбесі құлап, оқиға орнынан түсірілген видео әлеуметтік желілерде кеңінен тарады, деп хабарлайды kznews.kz.
Куәгерлердің айтуынша, төбе опырылған сәтте асхана ішінде сегіз-тоғыз адам болған. Келушілердің көпшілігі дер кезінде сыртқа шығып үлгерген. Салдарынан бір әйел жеңіл жарақат алып, денесін соғып алған.
«Қазақстан темір жолы» ұлттық компаниясының мәліметінше, оқиға 28 маусым күні таңғы сағат 05:35 шамасында вокзал аумағындағы «Етас» ЖШС-не тиесілі қоғамдық тамақтану орнында болған.
Компанияның хабарлауынша, вокзалдың медициналық пунктіне асхананың екі келушісі жүгінген. Оларға алғашқы медициналық көмек көрсетілгенімен, екеуі де жедел жәрдем шақырудан бас тартқан. Оқиғаға байланысты вокзал бастығының кезекші көмекшісі тиісті акт рәсімдеген.
ҚТЖ өкілдері асхана орналасқан нысан ескі вокзал ғимаратының жекеменшік бөлігінде екенін атап өтті. Осыған байланысты ғимараттың техникалық жай-күйі мен қауіпсіздігіне меншік иесі жауапты екені хабарланды.
