Бүгін, 12:56
Әлеуметтік желіде тараған ақпаратқа сәйкес, оқиға 2 қазанда болған. Балабақшада жүрген бүлдіршін ыстық сорпаға күйіп, ауыр жарақат алған.
Астанада балабақшада ыстық сорпаға күйіп қалған бір жарым жастағы бүлдіршінге қатысты қылмыстық іс қозғалды. Баланың денесінің 10 пайызы үшінші дәрежелі күйік алған, деп хабарлайды kznews.kz.
Баланың анасының айтуынша, оқиғадан кейін балабақша өкілдері болған жағдайға өздерінің қатысы барын мойындамаған.
Астана қалалық полиция департаменті аталған дерек бойынша тергеу жүргізіліп жатқанын мәлімдеді.
«Балабақша қызметкерінің кәмелетке толмаған баланың қауіпсіздігін қамтамасыз ету жөніндегі міндеттерін тиісінше орындамауы» дерегі бойынша қылмыстық іс қозғалды. Тергеу аясында бейнебақылау камераларының жазбалары алынып, қазір зерттеліп жатыр», – деп хабарлады полиция.
Қазіргі уақытта оқиғаның барлық мән-жайы анықталып жатыр.
