Бүгін, 14:40
Астанада алдағы қысқы жылыту маусымына қажетті жылу қуатының резерві дайындалды. Қаладағы жылумен жабдықтау нысандарын қысқа әзірлеу жұмыстары аяқталуға жақын, деп хабарлайды kznews.kz елорда әкімдігінің ресми сайтына сілтеме жасап.
Қазір Астананың орталықтандырылған жылумен жабдықтау жүйесіне бес негізгі энергия көзі кіреді. Олар – ЖЭО-1, ЖЭО-2, ЖЭО-3, сондай-ақ «Тұран» және «Оңтүстік-Шығыс» газ жылу станциялары. Әкімдік мәліметінше, жасақталған резерв жылыту маусымында қаланың қажеттілігін толық өтеуге және жүктеме артқан жағдайда қосымша қор пайдалануға мүмкіндік береді.
Елорда халқының көбеюі мен жаңа аудандардың бой көтеруіне байланысты жылу қуатын арттыру жұмыстары да жалғасып жатыр. Қазіргі уақытта ЖЭО-3-тің көмірмен жұмыс істейтін бөлігінің құрылысы жүргізілуде. Сонымен қатар ЖЭО-2-дегі су жылыту қазандығы кеңейтіліп, қайта жаңғыртылып жатыр. Жоба аясында №7 және №8 қазандықтарды орнату көзделген.
Бұдан бөлек, қуаты сағатына 620 Гкал болатын «Телман» газ жылу станциясын биыл пайдалануға беру жоспарланып отыр. Жаңа нысан жылу қуатының резервін ұлғайтып, қаланы жылумен жабдықтау жүйесінің сенімділігін арттыруға тиіс.
Әкімдік қолданыстағы тұрғын үйлермен қатар жаңадан салынып жатқан аудандарды да тұрақты жылумен қамтамасыз ету үшін қосымша қуат көздерін қалыптастыру жұмыстары жалғасатынын мәлімдеді.
