Бүгін, 23:37
Тамыз–қыркүйек айларында өтетін "Батыл тойтарыс – 2026" стратегиялық командалық-штабтық оқу-жаттығуына дайындық аясында әскери бөлімдердің жеке құрамы, қару-жарағы мен әскери техникасын оқу аудандарына кезең-кезеңімен жеткізу басталды.
Қорғаныс министрлігінің мәліметінше, әскерлер теміржол эшелондары, әскери автоколонналар, сондай-ақ, майдандық және армиялық авиация арқылы тасымалданады. Осыған байланысты алдағы апталарда еліміздің кейбір өңірлерінде әскери техниканың қозғалысы жиілеуі мүмкін.
Қорғаныс министрлігінің ресми өкілі Әйгерім Ағылтаеваның айтуынша, "Батыл тойтарыс – 2026" жаттығуы Қарулы күштердің жауынгерлік әзірлігін кешенді бағалауға арналған жоспарлы стратегиялық оқу-жаттығу болып табылады.
- Оқу-жаттығу барысында әскерлерді қолдану, құрлықта, әуе кеңістігінде, теңізде және киберкеңістікте күштердің өзара іс-қимылы пысықталады. Бұл іс-шаралар әскери басқару органдары мен Қарулы күштердің бірлескен іс-қимылын жетілдіруге және қазіргі заманғы әскери міндеттерді орындауға дайындық деңгейін арттыруға бағытталған, – деді Әйгерім Ағылтаева.
Сондай-ақ, ол азаматтарды сабыр сақтауға, әскери техниканың қозғалысына түсіністікпен қарауға және тек ресми ақпарат көздеріне ғана сүйенуге шақырды.
Яғни, Қорғаныс министрлігі тексерілмеген ақпаратты тарату мен жалған мәлімет жариялау Қазақстан Республикасының заңнамасына сәйкес жауапкершілікке әкеп соғатынын еске салды.
