АҚШ иммиграциялық визаларды беруді уақытша тоқтатқан елдер қатарына Қазақстан да енгізілді. Бұл тізімге барлығы 75 мемлекет кірген, деп хабарлайды kznews.kz NBC News дерегіне сүйеніп.
АҚШ Мемлекеттік департаментінің мәліметінше, шектеу Америка Құрама Штаттарына тұрақты қоныс аударуды жоспарлаған шетел азаматтарына арналған иммиграциялық визаларға ғана қатысты. Ал уақытша жұмыс істеуге, білім алуға немесе туристік мақсаттағы қысқа мерзімді визалар бұл шешімнен тыс қалған.
Трамп әкімшілігінің бұл шешімі 21 қаңтардан бастап күшіне енеді. Мемлекеттік департамент өкілдері визаларды беру АҚШ жаңа иммигранттардың америкалық салық төлеушілер есебінен материалдық пайда көрмейтініне көз жеткізілгенге дейін тоқтатылатынын атап өтті.
Аталған шектеу қолданылатын елдер қатарында Қазақстанмен бірге Армения, Әзербайжан, Беларусь, Ресей, Қырғызстан және Өзбекстан да бар.
