Бүгін, 18:22
Сербия астанасы Белградта қаза тапқан қазақстандық Амира Қанаттың өлімі қоғамда үлкен резонанс тудырды. Марқұмның туыстары оның өлімі кездейсоқ болмағанына сенімді екенін айтып, тергеудің әділ жүргізілуін талап етуде. Ал қыздың соңғы күндері бірге тұрған танысы өз нұсқасын ұсынып, Амираның жеке күнделігін жариялады, деп хабарлайды kznews.kz.
Белградтағы қайғылы оқиғаға қатысты Сербия полициясы әзірге нақты қорытынды жасаған жоқ. Тергеушілер оқиғаның барлық ықтимал нұсқасын, яғни жазатайым оқиға, өз-өзіне қол жұмсау немесе қасақана кісі өлтіру болуы мүмкін деген болжамдарды тексеріп жатыр.
Белградтағы қайғылы оқиға
Сербиялық Kurir басылымының мәліметінше, Қазақстан азаматы Амира Қанат Белград қаласының орталығындағы тұрғын үйдің алтыншы қабатындағы пәтердің балконынан құлаған. Оқиға орнына келген дәрігерлер оның көз жұмғанын тіркеген.
Оқиға кезінде пәтерде болған Ресей азаматы, 22 жастағы Влад Даниленко полицияға Амираның оның сүйіктісі болғанын және белгісіз себеппен балконнан құлағанын айтқан.
Қазақстанның Сыртқы істер министрлігі Сербиядағы елшілік жергілікті құқық қорғау органдарымен бірлесіп оқиғаның мән-жайын анықтап жатқанын, ал дипломаттар марқұмның жақындарымен тұрақты байланыста екенін хабарлады.
Туыстары күмән келтіруде
Амираның әкесі Жангелді Қанат қызының өліміне қатысты көптеген сұрақ бар екенін айтып, әлеуметтік желі арқылы бірнеше рет үндеу жариялаған.Ол қызы бірнеше күн бойы байланысқа шықпағанын айтып, Влад Даниленко мен тағы бірнеше адамның оқиғаға қатысы болуы мүмкін деген күдігін білдірген. Кейін қыздың қаза тапқаны белгілі болған соң, отбасы мәйітті Қазақстанға жеткізу үшін қаражат жинай бастады.
Марқұмның туыстары Сербияда жүргізілген сот-медициналық сараптаманың нәтижесін күтуде. Олардың айтуынша, тергеу барлық жайтты жан-жақты әрі объективті анықтауы тиіс.
Жеке күнделік жарияланды
Интернетте өзіне бағытталған айыптаулардан кейін Влад Даниленко өз ұстанымын жариялап, Амираның жеке күнделігінің суреттерін көрсетті. Жарияланған жазбалардың бірінде өзіне қол жұмсау туралы ойлар айтылса, екінші бетінде қыздың алдағы жоспарлары жазылған. Онда серб тілін үйрену, Будапештке бару және жаңа адамдармен танысу сияқты мақсаттар көрсетілген.
Алайда марқұмның туыстары бұл күнделіктің шынайылығына күмән келтіреді. Олардың айтуынша, қолжазба Амираның жазуына ұқсамайды. Сондай-ақ, егер күнделік расымен маңызды дәлел болса, ол әлеуметтік желіде емес, тергеу материалдарының құрамында болуы керек еді деп есептейді.
Марқұмның жақындарының айтуынша, Амираның телефоны қатты зақымданған, құрылғы қосылмайды және оған қойылған құпиясөз өзгертілген. Олар енді тәуелсіз сарапшылардың көмегімен телефондағы деректер мен хат-хабарларды қалпына келтіруді жоспарлап отыр.
Туыстарының пікірінше, егер ешкімнің кінәсі болмаса, неге телефон бұзылған, құпиясөз өзгертілген және жазбалар жоғалып кеткен деген сұрақтарға жауап берілуі қажет.
Тағы бір куәгер өз нұсқасын айтты
Оқиғадан кейін Амираның танысы Даниэлла да көпшілік алдына шығып, өзінің оқиғаға қатысты білетіндерін жариялады. Оның айтуынша, олар шілде айында танысып, бірнеше рет бірге уақыт өткізген. Даниэлланың сөзінше, Амира отбасымен қарым-қатынасы күрделі екенін айтып жүрген және қайғылы оқиға алдында Владпен кездесіп жүрген.
Сондай-ақ ол Амираның бірнеше ай бойы жеке күнделік жүргізгенін, онда отбасындағы қиындықтар туралы жиі жазылғанын мәлімдеді. Алайда бұл жерде де жауапсыз сұрақтар бар. Күнделік таныстарының қолына қалай түскені, оны алғаш кім алғаны және не үшін әлеуметтік желіде жарияланғаны әзірге белгісіз.
Әлеуметтік желідегі соңғы жазбалары
Ulysmedia зерттеуіне сәйкес, Амираның әлеуметтік желідегі парақшалары оның өмірге құштар адам болғанын көрсетеді. Ол саяхаттаған, аспаздықты ұнатқан, жаңа адамдармен танысқан және шетелде жаңа тәжірибе жинауға ұмтылған.
Қайғылы оқиғадан бірнеше күн бұрын жариялаған видеоларының бірінде Амира Белград көшелерін аралап, жаңа адамдармен танысқанын айтып:
«Кейде кештің мүлде басқаша өтуі үшін үйден шығып кетудің өзі жеткілікті», – деген жазба қалдырған.
Туыстарының айтуынша, Амира ҚБТУ-ды тәмамдаған, білімге құштар, ашық мінезді әрі мақсатшыл қыз болған.
