Алматы қаласы ТЖД мәліметінше, үш бала мен бір ересек тауға көтерілген. Қайтар жолда жасөспірімдердің бірінің үстіне тас құлаған.
Оқиға орнына «Тұйықсу» бақылау-құтқару бекетінен Құтқару қызметінің мамандары аттанған.
«2009 жылы туған зардап шегушіге жеткен құтқарушылар оның білегінің ашық сынығын анықтады. Жасөспірім есін білетін жағдайда болып, өздігінен қозғала алды», – делінген ресми хабарламада.
Құтқарушылар жасөспірімді іздестіру-құтқару бекетіне жеткізіп, ТЖМ Қауіп-қатер медицинасы орталығының дәрігерлеріне тапсырды. Оның жағдайы тұрақты деп бағалануда.
ҚР Төтенше жағдайлар министрлігі туристер мен тауға шығуды ұнататындарға тасты аймақтарда сақ болуды, үгіліп тұрған жартас астынан өтпеуді және тас құлауы мүмкін жерлерде алдыңызда жүрген адамдардың тура астына шықпауға кеңес береді.
