31 қазан, 2025
Алматыда танымал әнші Қайрат Нұртастың концерті қарсаңында қауіпсіздік шаралары күшейтілді. Бұл туралы қала полиция департаментінің баспасөз қызметі хабарлады, деп хабарлайды Kznews.kz
Полицияның мәліметінше, 2025 жылдың 31 қазанында Орталық стадионда өтетін концерт кезінде құқық қорғау органдары қоғамдық тәртіп пен көрермендердің қауіпсіздігін қамтамасыз етеді.
«Кептелістердің алдын алу мақсатында Орталық стадион маңындағы көлік қозғалысына уақытша шектеулер енгізіледі. Шектеу Абылай хан даңғылы, Байтурсынов, Мұқанов және Сәтпаев көшелерінің аумағын қамтиды. Қала тұрғындары мен қонақтарынан енгізіліп жатқан шараларға түсіністікпен қарап, жол бағыттарын алдын ала жоспарлауды сұраймыз. Азаматтардың қауіпсіздігі - біздің басты міндетіміз. Қоғамдық тәртіпті сақтап, полиция қызметкерлерінің нұсқауларын орындаңыздар», – делінген полиция департаментінің хабарламасында.
Сондай-ақ, департамент өкілдері барлық шаралардың басты мақсаты – қала тұрғындары мен қонақтарына қауіпсіз әрі жайлы жағдай жасау екенін атап өтті.
