Бүгін, 17:09
Швейцарияның SWISS әуе компаниясына тиесілі Сеул–Цюрих бағытындағы LX123 рейсінің Алматыға шұғыл қонуына қатысты жаңа мәліметтер жария болды. Белгілі болғандай, ұшақтың бағытын өзгертуіне борттағы екінші пилоттың денсаулығы себеп болған, деп хабарлайды kznews.kz.
Airbus A350 ұшағында 227 жолаушы мен 14 экипаж мүшесі болған. Ұшу барысында екінші пилоттың жағдайы күрт нашарлаған. Оған жолаушылар арасындағы үш дәрігер алғашқы көмек көрсеткен.
Шетелдік БАҚ таратқан мәліметке сәйкес, дәрігерлер пилотты мүмкіндігінше тезірек ауруханаға жеткізу үшін ұшақты ең жақын қолайлы әуежайға қондыруға кеңес берген. Осыдан кейін экипаж Алматы әуежайына бағыт алған.
SWISS әуе компаниясы жағдайға байланысты пікір білдіріп, қызметкердің денсаулығы бірінші орында екенін атап өтті.
— Әріптесіміздің денсаулығы мен амандығы — біз үшін ең басты мәселе, — деп мәлімдеді компания өкілдері.
Сондай-ақ тасымалдаушы рейстің кешігуі мен бағыттың өзгеруі жолаушылардың жоспарына әсер еткенін айтып, қолайсыздық үшін кешірім сұрады.
Алматы халықаралық әуежайының баспасөз қызметі пилоттың «жедел абдоминалдық синдром» күдігімен №4 қалалық ауруханаға жеткізілгенін хабарлады.
Дәрігерлер оның жағдайын бақылауға алған.
