11 желтоқсан, 2025
Алматы 26 қаңтар күні әлемдік футбол жанкүйерлерінің орталығына айналмақ. Бұл күні мегаполиске FIFA World Cup-тың түпнұсқа кубогы жеткізіледі. Әлем футболының ең басты рәмізін Қазақстан тұрғындары алғаш рет осындай жақын қашықтықтан тамашалау мүмкіндігіне ие болады, деп хабарлайды kznews.kz.
Футбол тарихындағы ең қастерлі трофей Қазақстанға арнайы ұйымдастырылған халықаралық тур аясында әкелінеді. Көрме Алматы қаласы әкімдігі мен Қазақстан футбол федерациясының қолдауымен өтеді. Шараның мақсаты — бұқаралық спортты дамыту, жастардың футболға қызығушылығын арттыру және қала тұрғындарына әлемдік деңгейдегі іс-шараны өз көзімен көру мүмкіндігін ұсыну.
Бұл оқиғаны ерекше ететін жайт — күміс тостаған Алматыда бар болғаны бірнеше сағат қана болады. Сондықтан да футбол сүйер қауым үшін бұл — сирек кездесетін, тарихи маңызы зор мүмкіндік.
