Кәсіпкер Тұрсын Алагөзовтің бұрынғы жұбайы Ляйсира Марат режиссер Ақан Сатаевтың экс-жұбайы Назира Бақаеваның әлеуметтік желіде кеңінен талқыланған сұхбатына қатысты пікірін білдірді, деп хабарлайды kznews.kz.
Ляйсира Марат жариялаған жазбасында Назира Бақаеваның ажырасудан кейінгі жеке тәжірибесіне тоқталып, оның ашық мәлімдеме жасауын маңызды қадам деп бағалаған.
Оның айтуынша, Назира Бақаева осы жылдар ішінде жеке өміріндегі күрделі сұрақтарға жауап тауып, сол тәжірибесін көпшілікпен бөлісуді жөн көрген. Ляйсира Марат бұл қадамды ішкі тұрақтылық пен жаңа кезеңнің басталуы ретінде сипаттаған.
Сонымен қатар ол кәсіпкер Жұмабек Жанықұловтың бұрынғы жұбайы Жаннаның өміріндегі қиын кезеңді мысалға келтіріп, ажырасудан кейін әйелдер жиі ауыр әлеуметтік және тұрмыстық сынақтарға тап болатынын атап өтті.
Назира Бақаеваның сұхбаты әлеуметтік желі қолданушылары арасында кеңінен талқыланды. Сұхбат барысында ол некедегі қиын сәттердің бірі ретінде күйеуінің актриса Алмира Тұрсынмен қарым-қатынасын атаған. Сондай-ақ, көп әйел алуға дайын болмағанын мәлімдеді.
Өз кезегінде режиссер Ақан Сатаев ажырасу туралы пікір білдіріп, бұл шешімнің жеке себептерге байланысты қабылданғанын және үшінші тұлғаларға қатысы жоқ екенін айтты. Оның сөзінше, шешім екі тараптың келісімімен қабылданған.
Айта кетейік, Ляйсира Марат Тұрсын Алагөзовпен 27 жылдан астам некеде болған. Қазіргі уақытта кәсіпкер продюсер Баян Алагөзовамен некеде.
