Бүгін, 09:38
Әлеуметтік желіде танымал Алагөзовтар отбасының есімін пайдаланып, қазақстандықтардан ақша жинауды ұсынатын күмәнді жобалар тарай бастады, деп хабарлайды kznews.kz.
Белгілі тележурналист Айгүл Мүкей мұндай ұсыныстардың артында алаяқтық схема болуы мүмкін екенін айтып, жұртты сақ болуға шақырды. Оның сөзінше, танымал адамдардың атымен жасалған жарнамаға бірден сенуге болмайды.
Журналист ешкімнің себепсіз ақша таратпайтынын ескертіп, мұндай жобаларға қатыспас бұрын ақпаратты мұқият тексеру қажет екенін айтты. Ол өз жазбасында күмәнді бағдарламаға кіру үшін алдымен 20 мың теңге, кейін тағы 100 мың теңге аудару талап етілгенін жеткізген.
Айгүл Мүкей мұндай жағдайда «тегін ірімшік тек қақпанда болатынын» еске салды. Оның ескертуін желі қолданушылары да қолдап, белгілі тұлғалар мен қайырымдылық қорларының атын жамылып ақша сұрайтын ұсыныстарға сенбеуге кеңес берді.
Қолданушылардың пікірінше, алдын ала жарна немесе қандай да бір төлем сұрайтын қаржылық жобаларға аса сақтықпен қарау керек. Олар қазақстандықтарды күмәнді сілтемелерге өтпеуге және жеке деректерін бөгде адамдарға бермеуге шақырды.
