Бүгін, 16:59
Қазақстанда денсаулығына байланысты көлік жүргізуге медициналық қарсы көрсетілімі бар 21 мыңнан астам жүргізуші анықталды. Бұл туралы Денсаулық сақтау министрлігі мәлімдеді, деп хабарлайды kznews.kz.
Министрлік бұл жұмысты Ішкі істер министрлігімен бірлесіп жүргізіп жатыр. Мақсат – денсаулығына байланысты көлікті қауіпсіз басқара алмайтын адамдарды анықтау.
Ведомствоның мәліметінше, 2 246 адам әртүрлі себеппен диспансерлік есептен шығарылған. Ал 13 мыңнан астам жүргізушіге қатысты полиция департаменттері сотқа талап-арыз берген.
Сот шешімдері заңды күшіне енгеннен кейін 7,4 мың жүргізушінің көлік басқару құқығы тоқтатылды.
«Көлік жүргізу құқығын шектеу тек медициналық қарсы көрсетілім анықталған жағдайда қолданылады. Соңғы шешімді сот қабылдайды», – деп түсіндірді Денсаулық сақтау министрлігі.
Медициналық қарсы көрсетілімдердің тізімі Денсаулық сақтау министрлігінің №853 бұйрығымен бекітілген. Олардың қатарында эпилепсия, екі көздің көрмеуі, кейбір ауыр психикалық бұзылыстар және психоактивті заттарды қолдануға байланысты кейбір бұзылыстар бар.
Министрлік мұндай шаралардың басты мақсаты – жол қозғалысы қауіпсіздігін қамтамасыз ету екенін атап өтті.
