NASA жарты ғасырдан астам уақыттан кейін Жер орбитасынан тыс аймаққа алғашқы пилотталған ұшуды жүзеге асыруға дайындалып жатыр, деп хабарлайды kznews.kz.
Дереккөздің жазуынша, Artemis II миссиясы бүгін түнде ұшып, шамамен он күнге жуық ғарышта болады. Orion ғарыш кемесі Айды айналып ұшып, Жерге қайта оралады. Бұл – 1972 жылғы "Аполлон-17" миссиясынан кейінгі алғашқы тарихи сапар.
Экипаж құрамында төрт астронавт бар:
- Рид Уайзман – миссия командирі, тәжірибелі NASA астронавты;
- Виктор Гловер – пилот, Ай миссиясына қатысатын алғашқы афроамерикалық болады;
- Кристина Кох – маман, Айға ең жақын барған алғашқы әйел атанбақ;
- Джереми Хансен – канадалық астронавт, Айға бағытталған пилотталған миссияға қатысатын алғашқы шетелдік.
Бұл миссия аясында Ай бетіне қону жоспарланбаған. Негізгі мақсат – жүйелерді сынақтан өткізу және болашақ сапарларға дайындық.
Қайтар жолда капсула атмосфераға сағатына 40 мың шақырымға дейінгі жылдамдықпен кіреді.