Алматы – Өскемен бағытындағы республикалық маңызы бар тасжолда ірі және қайғылы жол-көлік оқиғасы тіркелді. Жетісу облыстық полиция департаментінің дерегінше, апат 10 желтоқсан күні түстен кейін, жолдың 462-шақырымында болған, деп хабарлайды kznews.kz.
Алдын ала мәліметтерге сүйенсек, KIA маркалы автокөліктің жүргізушісі ауа райының қолайсыздығына қарамастан қарсы жолаққа шығып кетіп, қарсы бағытта келе жатқан Toyota автокөлігімен бетпе-бет соқтығысты. Сол мезетте жолда ақтүтек боран соғып, көріну деңгейі төмендеген, ал асфальттың беті көктайғақ болған. Полицияның айтуынша, аталған факторлар апаттың ауыр болуына себеп болуы мүмкін.
Қатты соққы салдарынан төрт адам оқиға орнында көз жұмған, тағы төрт жолаушы әртүрлі деңгейдегі жарақатпен жақын маңдағы ауруханаға жеткізілді. Дәрігерлер жарақат алғандардың жағдайын тұрақтандыруға күш салып жатыр.
Қазіргі уақытта факті бойынша қылмыстық іс қозғалып, жол апатының нақты себептері мен мән-жайын анықтау үшін тиісті сараптамалар тағайындалған. Тергеу амалдары жалғасып жатыр.
Полиция қызметкерлері қаза тапқан азаматтардың жақындарына көңіл айтып, жүргізушілерді ауа райы нашарлаған уақытта жолда аса сақ болуға шақырды.
