Бүгін, 15:11
Кішкентай кезінде Бельгия азаматтары асырап алған қазақ қызы Селена Винк 24 жылдан кейін туған анасын іздеп тауып алды. Бұл туралы журналист Ғалымжан Қараманұлы әлеуметтік желідегі парақшасында жазды, деп хабарлайды kznews.kz.
Селенаның қазақша есімі – Зарина Нұрмұхамбетова. Ол бала күнінен Бельгияда өсіп, тәрбиеленген. Арада 24 жыл өткен соң өзінің туған жері мен биологиялық анасы туралы ақпарат іздей бастаған.
Журналистің жазуынша, Селена ұзақ ізденістен кейін туған анасын тапқан. Ол анасына ешқандай реніші жоқ екенін айтқан.
Қазіргі уақытта Селена Бельгияның Гент қаласында орналасқан "Тамыры қазақ" мәдени орталығына барып жүр. Орталықта ол қазақ тілін үйреніп, халқымыздың салт-дәстүрі мен ұлттық мәдениетін меңгеруде.
Сонымен қатар бойжеткен болашақ өмірін Қазақстанмен байланыстыруға қарсы емес екенін жеткізген. Селена қазақ жігітіне тұрмысқа шығуға дайын екенін де айтқан.
Шетелде өссе де, тарихи тамырын іздеп, қазақ мәдениетіне қызығушылық танытқан Заринаның оқиғасы әлеуметтік желі қолданушыларын әсерге бөледі.
