16 мамыр, 2025
Алматы қаласында Next Level атты ағылшын тілі курсы кенеттен жабылып, 200-ден астам адам ақшасынан айырылғанын және оқусыз қалғанын айтуда. Кейбірі бір айға, кейбірі алты айға, тіпті бір жылға алдын ала төлем жасаған. Алайда қаржы қайтарылмаған, деп хабарлайды kznews.kz.
Курс басшылығы жабылатыны жөніндегі хабарламаны тек кеше түнде жіберген. Осыдан кейін оларға мүлде байланысу мүмкін болмаған: телефон нөмірлері өшіріліп, әлеуметтік желідегі парақшалар жойылған. Сондай-ақ мұғалімдер мен әкімшілік қызметкерлер де жалақыларын ала алмағандарын жеткізді.
Зардап шеккендер бұл жағдайды әдейі ұйымдастырылған алаяқтық деп бағалап, құқық қорғау органдарына ұжымдық арыз жазуға дайындалып жатыр.
Next Level орталығының «Қалдыбек А» жеке кәсіпкерлігі (иесі – Қалдыбек Аманжол Саматұлы) және «Zanjani» ЖК (иесі – Занджаниджад Бекзад Рүстемұлы) арқылы жұмыс істегені белгілі болды.
