Бүгін, 19:15
Қырғызстанның Бішкек қаласындағы Манас халықаралық әуежайында 181 жолаушы отырған ұшақтың шассиі істен шығып, төтенше жағдай тіркелді. Оқиғадан кейін әуежай жұмысы уақытша тоқтатылды, деп хабарлайды kznews.kz.
Алдын ала мәліметке сәйкес, TezJet әуе компаниясының Бішкек – Ош бағыты бойынша ұшуы тиіс рейсі кезінде ұшақтың артқы шассилерінің бірі сынған.
Оқиға салдарынан борттағы барлық жолаушы мен экипаж мүшелері авариялық трап арқылы қауіпсіз эвакуацияланды. Ұшақта 181 жолаушы, екі ұшқыш және төрт бортсерік болған.
Әуежайдың ішкі рейстер терминалында жолаушыларға медициналық тексеру ұйымдастырылды. Оқиға орнында дәрігерлер мен өрт сөндіру қызметінің мамандары жұмыс істеп жатыр. Алдын ала мәлімет бойынша, қаза тапқандар жоқ, ал жеңіл жарақат алғандарға қажетті медициналық көмек көрсетілген.
Қазіргі уақытта TezJet әуе компаниясы оқиғаға қатысты ресми түсініктеме берген жоқ. Мамандар шассидің істен шығу себебін анықтап жатыр.
Төтенше жағдайға байланысты Манас халықаралық әуежайының жұмысы уақытша тоқтатылып, кейін әуежайдың жергілікті уақыт бойынша сағат 22:00-ге дейін жабылғаны белгілі болды.
