Бүгін, 01:03
Қарағандыда 15 жастағы қызды анасы мен өгей әкесі шариғат жолымен 38 жастағы ер адамға тұрмысқа берген оқиғаға бір жылдан астам уақыт өтті. Биыл қазанда сот қызды зорлаған ер адамды 17 жылға бас бостандығынан айырды. Алайда қорғаушы тарап апелляциялық шағым түсіргендіктен, үкім әлі заңды күшіне енген жоқ, деп kznews.kz 31-арнаның “Информбюро” бағдарламасына сілтеме жасап хабарлайды
Қыздың әкесі іс бойынша куәгер ретінде өтуде, бірақ сот процесінің барысынан толық хабарсыз. Оның айтуынша, қызы онымен сирек араласады. Өткен жылдың наурыз айында 15 жастағы қыз әкесіне анасы мен өгей әкесі оны 38 жастағы танысына күйеуге бергенін айтқан. Кейін ол сол жерден қашып кеткенін жеткізген.
“Зорлық жасаған адамның ата-анасы өте дәулетті. Бұл жағдай мені қатты алаңдатады. Қызым үшін қорқамын. Оны көргенде мүлде өзгеріп кеткенін байқадым — көзінде бұрынғыдай нұр жоқ”, – деді әкесі.
Сот отырысынан кейін әлеуметтік желілерде қыздың өз еркімен тұрмысқа шыққанын және күйеуінің оны күштеп ұстамағанын айтқан бейнежазба тарады. Алайда әкесі бұл сөздерді айтуға қызын мәжбүрледі деп есептейді.
Сотта қыздан жауап алу жабық режимде өтті, ал қалған отырыстар оның қатысуынсыз қаралған. Соған қарамастан, қыз сот процесіне қатысқысы келетінін білдірген. Сонымен қатар, отбасында басқа балалар бар екеніне қарамастан, ол анасы мен өгей әкесін ата-ана құқығынан айыру туралы талап арыз берген. Алайда үкім шыққанға дейін бұл мәселе қараусыз қалдырылған.
“Олар баланы өз-өзін кінәлі сезінуге итермелеп отыр. Басқа балалар ата-аналарын жақсы көреді, өгей әкесімен ойнайды, ал оған ‘сенде бірдеңе дұрыс емес’ деген ой қалыптастырады. Кінәлілер жазадан құтылу үшін балаға қысым көрсетіп жатыр”, – деді Абай аудандық білім бөлімінің бас маманы Марина Стрельникова.
Сот мәліметінше, апелляциялық шағымды қарау кейінге қалдырылған. Себебі іс прокурордың апелляция беру мерзімін қалпына келтіру туралы өтінішін қарау үшін бірінші сатыдағы сотқа қайта жіберілген.
