20 наурыз, 2025
20 наурыздан бастап Өскеменде мемлекеттік мекемелер мен бюджеттік ұйымдар үшін жаңа жұмыс кестесі енгізіледі. Бұл туралы Stan.kz ақпарат агенттігі хабарлайды.
Жаңа жұмыс кестесі туралы Шығыс Қазақстан облысы әкімінің орынбасары Дархан Сапанов қала әкімдігінде өткен жиында хабарлады. Жаңа ережелерге сәйкес, жұмыс күні 08:00-де басталып, 17:30-да аяқталады. Түскі үзіліс 12:00-ден 13:30-ға дейін созылады.
Бұл жаңашылдықтың басты ерекшеліктерінің бірі – жұмыс кестесінің икемділігі. Мұндай тәсіл Шығыс Қазақстан облысының басқа аудандарындағы оң тәжірибеге негізделген. Сол аудандарда осындай өзгерістер енгізіліп, өз тиімділігін көрсеткен. Қала билігі жаңа жұмыс тәртібі қызметкерлер мен қала тұрғындарының өмір сүру сапасын жақсартып, еңбек ұйымдастыру деңгейін арттырады деп сенеді.
Жаңа жұмыс уақыты талқыланған жиынға 300-ге жуық адам, соның ішінде мемлекеттік ұйым өкілдері қатысты. Жиналғандар өзгерістерге қолдау білдіріп, жұмыс күнінің ерте басталуы уақытты тиімдірек жоспарлауға мүмкіндік беретінін атап өтті.
Өскемен Шығыс Қазақстан облысында жаңа жұмыс кестесін енгізген соңғы қала болды. Билік бұл шешімнің еңбек жағдайларын жақсартып, тұрғындардың демалысы мен жұмысын тиімді үйлестіруге көмектесетініне сенімді.
Еске салайық, бұған дейін Шығыс Қазақстан облысы түгелдей "бұрынғы уақыт белдеуіне" ауысқаны туралы жазған едік. 13 наурыздан бастап Шығыс Қазақстан облысының екі ауданы – Шемонаиха және Глубоковскийдің мемлекеттік мекемелері, кәсіпорындары мен әлеуметтік сала қызметкерлері жаңа кесте бойынша сағат 08:00-де жұмысқа келеді. Олардың жұмыс күні сағат 17:30-ға дейін, түскі үзіліс 12:00-ден 13:30-ға дейін болады.
