Жәнібек Әлімханұлы мен Сағадат Рахманқұлдың жекпе-жегін тікелей эфирде көрсетеді
Екі жақты келіссөздер нәтижесінде «Қазақстан» телерадиокорпорациясы отандық кәсіпқой боксшыларымыздың жекпе-жегін «Qazaqstan» және «Qazsport» телеарналарында көрсету құқығына ие болды.
4 қараша күні АҚШ-тың Техас штатындағы Эль-Пасодағы Don Haskins Convention Center кешенінде қазақ боксшылары Жәнібек Әлімханұлы мен Сағадат Рахманқұл бокс кешінің андекартында шаршы алаңға шығатын болады. Басты жекпе-жек мексикалық Мигель Берчельт (34-1, 30 КО) пен Мигель Роман (60-12, 47 КО) арасында өтеді.
Бұл Жәнібек Әлімханұлының (3-0, 1 КО) кәсіпқой бокстағы төртінші жекпе-жегі болмақ, оның қарсыласы 32 жастағы америкалық былғары қолғап шебері Вон Александр (12-1, 8 КО). Ал, Сағадат Рахманқұл (3-0, 1 КО) пуэрто-рикалық Никлаус Флазбен (5-1, 4 КО) қолғап түйістіреді.
Айта кетейік, Жәнібек Әлімханұлының әуесқой бокста қол жеткізген жетістіктері бір төбе. Ол әлем және Азия чемпионы, Азия ойындарының жеңімпазы, Қазақстанның бірнеше дүркін чемпионы. 2018 жылы Жәнібек кәсіпқой боксқа ауысып, 3 жекпе-жек өткізіп үлгерді. Барлығында жеңіске жетіп, біреуін нокаутпен аяқтады. Ал, қарсыласы Вон Александр кәсіпқой бокста 13 жекпе-жек өткізіп, 12-де жеңіске жетіп, 8 кездесуін нокаутпен аяқтаған.
Сағадат Рахманқұл әуесқой бокста 69 келіге дейінгі салмақта 2013 жылы ел біріншілігінде топ жарып, ал 2014 жылы күміс жүлдегер атанған болатын.
Отандасымыздың жекпе-жектерін «Qazaqstan» мен «Qazsport» телеарналары 4 қараша күні, сағат 04:00-де тікелей эфирде көрсететін болады. Сондай-ақ, жекпе-жектерді «Qazaqstan tv» мобильді қосымшасы арқылы көре аласыздар!
«Қамшы» сілтейді
