полиция апаттың нақты себебін атады

Тергеу 26 маусымға дейін жалғасатын болады

НҰР-СҰЛТАН, 14 маусым — Sputnik. Елорданың полиция департаменті 26 наурыз күні елордада болған ірі жол-көлік оқиғасының себебін атады, деп хабарлайды Sputnik Қазақстан тілшісі.

Полиция департаменті басшысының орынбасары Ғазиз Нұрқаевтың айтуынша, №303 автобустың жүргізушісі есінен танып қалған.

«Біз қылмыстық іс қозғадық. Сот-медицина сараптамасына сәйкес, №303 автобустың жүргізушісі Оспанов есінен танған. Салдарынан жол-көлік апаты болды. Тергеу 26 маусымға дейін жалғасады», — деді Нұрқаев елордада өткен баспасөз мәслихатында.

Нұр-Сұлтандағы 3 автобус апаты

Айта кетсек, биыл 26 наурызда елордағы Ұлы Дала көшесі мен Қабанбай батыр даңғылы қиылысында ірі жол-көлік оқиғасы болды. Қала маңына қатынайтын №303 автобус пен №12 автобус соқтығысқан. Кейін оларға №53 қоғамдық көлік пен жедел жәрдем көлігі соғылды. 

Жол апаты салдарынан 53 жастағы автобус жүргізушісі мен 26 жастағы жолаушы қыз қаза тапты. 30-ға жуық адам зардап шекті.

Сараптамаға сәйкес, автобус жүргізушісінің жүрегі ауырған. Сол күні жүрегі сыр беріп, қан айналымы баяулаған. Миға қан бармағандықтан, жүргізуші есінен танып қалыпты.